President Asif Ali Zardari ne Youm-e-Ashura par jari bayan mein kaha ke Youm-e-Ashura Hazrat Imam Hussain (A.S) ki Maidan-e-Karbala mein shahadat ki yaad taza karta hai. Waqia Karbala se sabaq seekhte hue ittehad o ittefaq ka muzahira karne, zulm o jabar aur batil quwaton ke khilaf kharay hone ki zarurat hai.
Unho ne kaha ke Hazrat Imam Hussain (A.S) aur saathiyon ne Islami aqdar ke ihya aur Ummat-e-Muslima ke huqooq ki khatir janon ka nazrana pesh kiya. Hazrat Imam Hussain (A.S) ki shahadat Ummat-e-Muslima ke liye azeem dars hai. Hazrat Imam Hussain (A.S) ne shadeed dabao aur mushkilat ke bawajood zalim aur jabar hukmaran ke khilaf kalma-e-haq buland kiya aur zulm ke khilaf awaaz uthane aur aazmaishon mein sabit qadam rehne ka dars diya.
President Asif Zardari ka mazeed kehna tha ke Maidan-e-Karbala mein qurbanian ahl-e-iman ke jazbat ko imtehan o ibtila ke waqt mein jala bakhshati hain. Aaj Kashmiri aur Falasteeni bhai aur behnon ko aazmaishon aur masayib ka samna hai. Falasteeni aur Kashmiri awaam insaf aur azadi ke liye sakht mushkilat ka samna kar rahe hain. Unki jiddojehad paidar azm o istiqlaal aur jazbe ka saboot hai. Qaum ki falah aur behtari ki khatir zaati mafadat aik taraf rakh kar kisi bhi qurbani se dariagh nahi karna chahiye. Poori qaum se sabr aur mehnat karne aur insaf ke liye kharay hone ki apeal karta hoon.
